【蘭桂坊洋腸David再獵港女，最後對情侶簡直係拍拖最壞榜樣】
唔知大家仲記唔記得四年前既「蘭桂坊洋腸食女事件」？當年兩個洋腸David、Alex去蘭桂坊想食香港女仔，途中見到一對情侶喺度傾偈，洋腸竟然無視男朋友，一手攬住女仔纖腰想帶走佢。雖然嗰名男朋友死拖住女仔手唔放，但個女仔就抱住Alex好享受咁狂un。最後女仔棄男朋友而去，同新識既洋腸sweet爆走人。後來洋腸將條片名為「Alex Steals Girl From Chinese Guy」放上Youtube曬命，條片一夜間瘋傳，個個係咁鬧港女崇洋。之後佢地繼續獵女，索性當成生意開收費網站 hellodavidbond.com放自己同亞洲女仔親密纏綿既「成果」，想睇足本就要比每月15美金既會費。
呢幾年兩個洋腸冇消失，近日又同徒弟喺銅鑼灣time square重施故技，出手撩喺街度拖住男朋友既女仔。頭嗰三位女仔同樣拒絕，有啲仲好不屑黑曬面咁走，直到第四位女仔勁熱情咁主動挨去洋腸度，男朋友一臉無奈，只係識企喺隔離叫女朋友翻譯英文......最後明知洋腸想食自己條女都唔出聲，仲冇阻止女朋友比自己個電話號碼人地，驚到扮死狗咁當睇唔到。
我真係睇唔落去🤦🏻♀️呢對情侶抵比人話男既廢、女既賤，兩個根本冇盡好做另一半責任，正正做曬拍拖大忌，都唔知佢地係咪真心中意大家。
首先個女仔明明拖住男朋友，男朋友目無表情一睇就知唔gur啦，究竟有冇諗過佢感受架？條洋腸擺明想溝自己，仲咁大膽繼續同佢傾落去做乜野，覺得比人撩比人溝好威，但有冇放男朋友在眼內？喺男朋友面前已經夠膽咁做，喺佢背後生埋仔都唔知。以為自己好索好正，比人讚兩句即刻係咁搞頭髮好似鬼唔知佢發曬姣、嗒曬糖咁。贏左洋仔，輸左個好男人，仲要比全世界以為港女好易溝，值得咩？各位女士，爭氣啲啦！
另外個男仔直頭戇居冇用，唔想小器扮大方都唔係揀呢個時候呀嘛？望住女朋友當街比人撩：冇反應，企定定由得佢比電話人地：當冇事，最後人地溝埋佢：冇咩所謂......痴線架！好似想送女朋友比人搞，柒下柒下咁。佢一係就say no，好霸氣咁拖住女朋友走；一係就睇穿女朋友真面目，好快啲鬆手甩難我就讚佢夠果斷。兩樣真男人行為都唔做，喺度淆，用性格內向細膽黎做藉口，真係比人帽左都唔可憐。第日女朋友想識男仔朋友、同人單獨飲酒、上人屋企都阻止唔到架喇，因為當初係佢冇做到男朋友本份先。
講完最壞榜樣，如果你地遇到同類事件千祈唔好學佢地：
💁🏻♀️假如有人無論當面定係wtsapp，明知自己有另一半都想溝可以點做？第一，堅決say no，強調自己有男朋友/女朋友；第二，block埋佢，唔好有任何交流。
💁🏻♀️相反另一半比人溝既你又可以點做？梗係攤出黎講啦，唔好當小事比佢自己處理呀，斬唔斷就仆街喇。適當時候拖住佢、錫啖佢示威，唔好怕柒，冇左男朋友/女朋友想柒都冇機會。
拍拖要比安全感對方，尊重大家，異性朋友就話有得傾，狗公同狗乸？No way！
(最後比返條link大家：https://youtu.be/xInEnTPtNtw)
Search